لوحات للفنان مراد الطلاوي

قصيدة " ساعة ماعنيها بتشوفني" للشاعر / السيد كامل

ساعة ماعنيها بتشوفني

بفكر300مرّه

ساعة ماعنيها بتشوفني

وتترجي الدموع جفني

مايسمعهاش

يفرط فيها بالساهل

فتتسحب علي خدودي

ومستنيه إيد تيجي وتنجدها

من الحاله اللي عايشاها

يطول الإنتظار تزهق

يزيد الكبت جواها

فتتفتح بيبان جفني علي الآخر

كأن دموعي بتسابق فبعضيها

مانا اللي اخترت نتفارق

فكنت لفرحتي سارق

وانا مش فاهم القصه

واتاري عشقها لسه

معشش جوّه وجداني

وخلاني

أقول معقوله فاكراني

وافكر 300 مره

ساعة ماعنيها بتشوفني

وتترجي الدموع جفني

مايسمعهاش

وياما أسئله كانت

بتخطر باللي وبترجع بدون الرد

عشان مقدرتش استوعب

بإن الحب معرفشي طريق الجد

باقيت عايش عشان افهم

وافرق بين شعور وقرار

ومين الأصل للتاني

ومين اختار

والاقي لبُعدنا حِكمه

لعمري سمعت عن قلب اتولد عاشق

ولا قلب اتولد معشوق

ده هوه الشوق

بيسرق مننا روحنا

ويهدينا الحياه ألوان

ويرّسم حِلمنا بإيده

واتاري ردها سابق لمواعيده

ساعة مانطقتها مره

{أسير الحب مش ممكن يكون مَالِك}

ساعتها بجد معرفتش

أساس الدمع فعنيها

وردت رد مفهمتوش

ولا عرفتوش فوقتيها

{عايزني انساك}

مافيش مانع

لكن قابليها خد فرصه

وفكر 300 مره

عشان النظره من جوّه

بتفرق عنها من برّه

ومع إني أسيره هواك

لكن واياك انا حره

ونسيتني

ومانسيتهاش

فضلت استنظر الماضي

يكون حاضر لاكنه ماجاش

واتاري صعب أنساها

وسهل عليها نسياني

ومن بعديها وانا عايش

حمامه فسرب أحزاني

بفكر 300 مره

ساعة ماعنيها بتشوفني

وتترجي الدموع جفني

مايسمعهاش

 

منقول من مدونة الشاعر صبري رضوان

قصيدة أبن الأرض ... للشاعر محمد المصري

طير جريح

·

 طيرجريح وفارد

ف الهوا باعو

وأقرب ماليه من 

غير تمن باعو

والكل خان

حتى ضلّ اتباعه

ولفين يروح

ف دنيا قوتها أوجاعو

ما له وطن ولاحى

والقلب نابض حى

نادى المنادى حى

بدموعه إتوضى

ورفع كفوفو للسما

يدعى الأحدالحى

يحميه 

لوالصقورجاعو

 ( أبن الأرض )
أنـــــــا ابــــــــن الأرض
ما في قرش ف جيوبي
طفحت الدم
لون الدم لون طوبي
أكون صعلوك
أكون سلطان
وما أخرج والله من توبي 
                                      أنا ابن الأرض
تهت كتير ف حواريها
ف شرق وغرب
بتقسى عليا واداديها
وأخليها
غناوي جميلة على عودي
                                      أنا ابن الأرض
صبري هو مفتاحي
وعطري الورد
دوا ترياق على جراحي
حلفت يمين
ما تدبل فيا أفراحي
ولو شوكي ملا ورودي
                                      أنا ابن الارض
رميت الزهر كام مرة
سقيتني الدنيا كاس مُره
ولو إن البشر غادرة
ما يبقى الحزن مكتوبي
                                     أنا ابن الأرض
ضربت بكف على كفّى
شمال وجنوب
لقيت صفّي
وجع  ف الفرح متخفّي
يا دنيا كفى وإستكفى
دا لون الأرض من لوني
                                     أنا ابن الأرض
يا نهر النيلي داويني
يا شهد وسال ماتسقيني
بمية حلال تحلينــي
وخضّر بالامل عودي
أنا ابن الأرض

قصيدة زلة لسان 21 ( باب الشمس ) ... للشاعر أسامة سند

قصيدة الأعراف من ديوان طقوس

 ·

(مستوطنات)

مخبوز بستر الليل

فراق

معجون بمية من الوطن دمى

مشيت

شايل كفوفى بس متحنى

مشيت

لا دهر من صلبى ولا سنوات

ولا ممكن يكون القلب

زى الطيف غريب

إسمى قوافل من بلاد البربر

المستهجنه

صورتى بتشبه هجِّة الكوليرا

لكن بصى عليا

وإنتى بتمارسى طقوس الرقص

هتشوفى ملاك

هاجرحدوده

عشان يكونلك من حدود الله

وطن

زلة لسان21 (باب الشمس)

·

أنا شمس

مبيجرجرش الليل طرحتها

ولا بيسلب إرادتها الفجر

لكن بتخاف

تتشاف

أنا زى العَوره

ف جسم السما

وحنين

من نهد الجنه

ولبن العقل

عشان كده يمكن يا حبيبتى

بتحبى تكونى البنت البكر

لكل قصايدى

وكل شخوصى

وكل ما أبحَّر ف الغرقان

بتحبى تغوصى

لكن محتاره

ف قلب العتمه

وقلب سؤالك

مين رح يقدر يفتح قلبى

لباب الشمس ؟

اه يا ضنايا

لو أعرف أحدد ملمس عشقك

لما ضلوعنا بتتكسَّر

ف الحضن

ونتدفى بروايحنا

ننام ع الفكره

فتتكلفت بجروحنا

تغطَّى قلوبنا

وتفضل تنحل ف وبرنا

لحد امَّا نموت

دايبين

زى البنطلونات اللى قسمناها

ف معركة امبابه

وزى الكمامات

اللى اتحطت على وش المماليك

والأرض

اما طاطينا ف نظرة بعض

وشفِّينا الوطن المحروق

ف رسومنا

وكنا ساعتها بنسأل روحنا

مين يقدر يبعتنا ف ثانيه

                                                                                                                         لباب الشمس         

قصيدة وبتسألي ... للشاعر محمد جابر

وبتسألى
ليه الولاد نزلو الميدان
فاتحين صدورهم للرصاص
حاطين كفنهم ع  الطريق
لو كنتى يوم تتاملى
او تنزلى
وسط الحوارى والبيوت  
وتبصى فى عيون البشر
كان راح تلاقى
ألف 100 مليون سؤال

كام اهة ساكنة فى القلوب
كام كلمة واقفة ما بين لسانك والرئة
كل النفوس متعبئة
كل المحارم مستباحة فى جسمهم
لو كان لسانهم يوم نطق
كام دمعة يبست ع الوشوش
كام حلم فيك تاه واتشنق
بأدين موالسة للنظام المستبد
بأدين بتعرف ايمتى ترخى او تشد
كرباج بيجلد فينا جلد
أحضان بتسرق مننا معنى الامان
شرايينا كرهت دمنا ذل وهوان
وعظامنا باتت ع الرصيف
تحلم بنور الفجر لما
فى يوم يشقشق او يبان
والفجر فيكى منفى عنك من زمان
ورا القضبان
وأنتى اللى كنتى معنى حر 
وحضن دافى للحياه
وطوق نجاه
وأرض طاهرة ادنست
فى يوم ما باعو عرضها
فى يوم ما خلو خيرها طارح شرها
فى يوم ما باعو غازها للى
واللى حرقو القبلة واللى 

فوق دمانا كات خطاهم
حازز فى نفسى لما اقولك مش ولادك
 مش ولادك
اللى خانو فيكى عهدك
واللى باعو حلم شعبك
واللى خلو الطيلر يهاجر
ودموعه فى عيونو نزيف
واللى خلو الشمس فيكى 
تبكى دم على سحابك مش ولادك
فاكرة لما  قلت ليكى
بكرة جايلك
دم فاير م التراب
بعزم ثاير م السحاب
وأديكى لسه بتسالى
ليه الولاد نزلو الميدان
فاتحين صدورهم للرصاص
حاطين كفنهم ع الطريق
نزلو عشان تعودى مصر يا مصرنا
بحق وحقيق

قصيدة خمسه هوا ... للشاعر هيثم عبد الشافي

كبايات الشاي وسجاير الطفايه
اللي ح تمري سته الصبح
تتأكدي من عددهم
ح ينسوكي باب التلاجة مفتوح كالعاده
مش ح تفتكري تطفي نور الصاله
والاكيد مش ح تلعبي دور الجمهور
وتملي المكتب
بني آدمين وجماد
ح تتأخر كائنات الادغال
اللي بتجمعكِ بيهم صداقه
بحسدكو عليها
وح تبرري -اكيد مش عارفين يركنوا-
الطبيعي في وقتها
اقولك مجنونه
لما اشوفكِ بتوافقي السمكه الام
علي فكرتها المطرقعه
خروجه في كيس بلاستيك
عشان زهقت من جو البيت
بجد...
مش قادر استوعب موقفك الدرامي
من سور البلكونه
وانت بترددي نفس الجمله
بعد فشل معاد بيتكرر يوماتي
حبيبي ... مش عارفه اطيـــــــر!!
حتي البت
اللي باخدها في حضني
يومين في الاسبوع
ومتعرفش اني ابوها
بتقطع رسوماتكِ
وعشان الروتين ميتحكمش
ح تاخدي قرص المنوم
وتستعدي
لحلم الدفايه الخشب
وناس غريبه
بيقضوا السهره معاكي
قدام طقطقوقه
لــ - سلامه حجازي-
ساعتها
ح تأكدي علي معلومتك للمره الالف
حبيبي ....
- اديسون -
راهن ع الفونوجراف ده بعلبه سجاير...!
ح أضحك وللمره الالف ح ارجع اعترف
مشهد الجري
لما حولتي الصاله لشارعين وتقاطع
وتطبيقكِ يوم وليله
عشان تخترعي من الصلصال
بني آدمين ينظموا المرور
لغه جديده
بتطرد كل الحلول التانيه
وبتأكد علي لون باب الشقه البينك
و و و . . .
عفوا
ح اشحن خمسه كمان
عشان نكمل ........!!

قصيدة أوتيل ... للشاعر محمد نبيل

" ما تعِدِّليش شَهَقَاتي "

هوّ هوّ نفس الأمر

و هيّ هيّ نفس النومة ..

على المرتبة الإنجلندر ..

اللي ما بتُقطُمش الضهر خـــــــالص

و نفس السؤال الغبي

اللي بنطرحه كل مرة

و احنا مبحلقين للسقف ..

إنتي اتخلقتي من من شعر صدري .. "

  و لّا انا اللي اتخلقت من حَلَمَاتك ؟ "

" ولّعي الأباجورة "

ورقي الإيفور..

و جيتارك الكهربائي ..

و بعترتهم ويَا الهدوم ..

على أرضية الغرفة الموكيت

جورنيكا بتِّف على منظر النجف الاستاتيك

حتى التفَّة بتتكرر

مع نفس رقصة أجسامنا ..

على عزف تأنيبة الضمير

بوستك المشبك ..

اللي قطَّعت شفايفي

و زنِّة التكييف ..

مع صرخة ماريا كاري من قلب السي دي

" I'd give my all ..

To have

 just one more night..

With you "

دباديب حمرا بتتكرر

الكعبة اللي فشلتي في بناءها ليا

و عجزي عن الطَواف

و إلحاد نَهَجانَّا احنا الاتنين

" سيبِك انتي .. "

الجملة الكدّابة ..

السايلة مع لُعاب بوقِك الصُغنطوط

" إنت جامد قووووي "

مش ماشيه خـــــــالص

مع رذاذ المطر ..

السايل على إزاز الألَمُوتال

أو حتى ريحة برفان ..

شَعرك الكانيش