من خلاياك الجذعيه

حاول مره
تفرغ عقلك من خلاياه
زي الجثه النايمه تملي
ف حضن سريرك
علق جلدك جوه دولاب
وامشي ف كل شوارع بكره
من غير توب
ماتبصش
على كل المانشيتات الحمرا
والدم النازل من جلد الجرنال
ماتبصش
على كل وشوش الناس الماشيه
من غير روح
من غير جسم
حاول تنسى
كفوف بتلم زبالة الأرض
لكفوف أصغر
هيه القوت
وبراح القهر
حاول مره
تدخل جوه محطة قطر
أركب جواه ف الوقت الضايع
واخرج بره براح الكون
ساعات ف العمر
متخافش
راح ترجع تاني ف قطر الساعه تسع ونص
راح تفتح معمل أوهامك
ومن خلاياك الجذعيه
راح تعمل مخ
مافيهوش أي قواعد منطق
مابيعرفش يشوف الصوره
بالمعدول
متخافش
راح تلزق راسك فوق الجسم
راح تلبس جلدك من تاني
وتنام م البوح
راح تمشي ف كل شوارع بكره
بس المره دي
من غير روح

وصف مصر

ف يوم وليله
اتغيرت
كل الخرايط ف الكتب
صبحوا العيال بيدوروا
على أسم مصر
ملقوهاش
قال الحكيم
أرسمها من وحي الخيال
أيدها اليمين كنوز دهب
والشمال واحة لازورد
راسها مينا وعينها مرسى
وقلبها .. قلعة فولاذ
نازل عليها شعرها
فاتحه بيبانها لطير نيون
جلده أمل
مش من أزاز
يوماتي يرحل للجنوب
هوه القدم
يقطف من النوبه العتيقه
ضحكها
يرميها جوه القاهره
وقلوب نحاس
تطرح غنا
درويش زمان
غنا لناسها وأهلها
ودليدا تهمس كلمتين
ف ودنها
يضحك نجيب
مع انه كان
لسه بيروي ف قصه عايشه
ف قلبها
وسومه تعلى بالغنا
عل القهوه قاعدين الحبايب
يسمعوا قصة تاريخ
حرافيش وعسكر
ياما عاسوا ف أرضها
لكنهم
حفنة ورق
مكتوب على جبينها الغرق
ف نيلها وف كتب التاريخ
جرس الكنيسه
كان ياما كان
يخرج بصوته والأدان
كروان وبيرمي السلام
على قلوب المؤمنين
قال الحكيم
أرسمها من وحي الخيال
رسمتها أنا والعيال
بجناحين
بعديها قال
وعيشوا بيها وورثوها
لولادكوا وولاد الولاد
يمكن أيزيس
تخرج ف يوم من قبرها
وتلم تاني شملها
وبأذن ربي وربها
يرجعلها
نبض الحياه

قصيدة تلات صور للموت للشاعر ... هيثم عبد الشافي

مفتتح .....
- مواويلي بنات ليل ع قبري طافوا
مواويلي بنات حور تاني موته شافوني ف السما خافوا
مواويلي بحر .. البحر ف عينِك ميه وسمك قوليلي ليه ارسمك شط
وفضا
فضا .. تالت مساحه حلوه تعرف تموت نفسك فيها من غير ما
تعاند بناتك
   

لما .....
ف موسم الموات
كشفت جسدي وعدتِك بموتي
صعب عليكي أموت عريان
كفّاني توبك كفن
لامين غسِل لامين دفن
كل اللي فاكروا طبطبتي طلع النفس
كاللي فاكروا كان كفِك مداه
يااااااااه
تحت التراب دب اديكِ شهوه الحياه
تحت التراب سلم وحصان
اسكت ترخي الحيطان
أنوي اجيلِك ضلمه
وكل اللي هنا عميان
كل اللي هنا ساكت
كل اللي هنا ضد
خَصّيتك بالندا
ليه الحيطان ترد ؟!
الحقيني ...
توبِك اللي ف الأصل كفني عَت
زعلان مِنك يابت
أيوه زعلان
شفاف توبِك
لاينفع كسوه ولاأكفان
مواويلِك في الغنا مُره
أنا مات مِنك
ودي تالت مره
يجي موسم الموات
أملّي اسمي بدالِك ...