جوه الشوارع
مزيكا من دم البشر
جيتارات ورق ... وعود بيعزف ع الحجر
جوه الشوارع
مزيكا من دم البشر
جوه الشوارع
ترقص الأنوار تضوي وتنطفي
وتتمايل خطوط النص ع الجنبين
يخرج رصيف العقل من سجنه المباح
ويجري ف الأرض البريئة بدفتين
جوه الشوارع
مزيكا من دم البشر
يخرج إبو ( 1 )
على نغمة الحلم اللي هايمه ف حلقنا
شادد لجامه \ يضمنا
لم ننكفي
يخرج إبو
من فكرة التحرير
يخرج إبو
كاسر إشارات الثبات
حكام أقاليمه الطغاة
حكام ببي
يخرج إبو
على مركب الشمس العتيق
جوه الشوارع
مزيكا من دم البشر
جوه الشوارع
تنقاس ملامحنا البريئه ف البراح
بالبراح
جيتارات سحب ... توصف سمار الوش وشقوق الأيدين
وزحمة المدن العتيقه
أنغام \ مطر ... وقمر بينزل م السما
ويعتصم وسط الحقيقه
والشيخ أمام
يرمي على الأرض السلام
( هما مين واحنا مين )
أقسم الخمسة ف تاريخك حتتين
واعدل الحته اللي مايله \ مستقيم
وأقسمها تاني حتتين
على آخر الأتنين لفوق
ثبت نصها
والتاني برضه بعرضها
واكتب تاريخك من جديد
ثوره ثالب ثوره أبدا ً مش راح يكون صفر العبيد
وعلم البشرية معنى الكلمه من ألفك وعيد
ويعني أيه
دو لا مي
يعني أيه
فا صو لا سي
جوه الشوارع
مزيكا من طينة البشر
( 1 ) إبو : حكيم مصري عاش في زمن الفرعون ببي الثاني
إهداء إلى شهداء ثورة 25 يناير
ليست هناك تعليقات:
إرسال تعليق