في الأرض حلم
لكنه خايف في يوم يعيش
وشه بريء .. مع أنه محبوس ف الأفيش
(المشهد الأول)
خرجت الصبح
أدور على حلمي اللي سبته
جنب النيل
مالقيتش حلمي .. ولا لقيت النيل الحزين
مالقيتش غير خوفي اللي قاعد ف الخلا
تايه وباصص للسما
وعينه حبسه .. دمعتين
(المشهد التاني)
الكل ماشي ف الشوارع من غير عيون
الكل فاقد الذاكرة
الكل خايف ف يوم يدوس
على ذكرى كانت مؤلمه
أجساد كتير ماشيه في أرض الشقا
والهنا .. مشنوق على دايرة قمرنا
المعتمه
(المشهد التالت)
مرسوم أنا على ضل حيطه
والحيطه ضلي
(المشهد الرابع)
ماشي بيحلم بالأمان
وأبنه جنبه
ورصاصه طايشه
قتلت لحن الأمان
قتلت أبنه
بكى الحزين .. واترسم في عينه صوره للجنون
وبعد شهر .. كان الحزين
غرقان في دمه
(المشهد الخامس)
سرقوا الجورنيكا
سرقوا حكمة بيكاسوا
من الأمم المتحدة
سرقوها وسرقوا العبره
والحرب العالمية التالته
كانت البديل
نسيوا البشر .. واتنست كل الحروب
والجنون .. عاد من بعد الرحيل
ماتسئلوش مين أقتل فينا البراءه
ماتسئلوش مين روى الأرض خوف
وازاي بقينا جوه غابه
متسئلوش عن أي شيء
استخبوا جوه الملاجيء
وانسوا الخرايط والحدود
ارسموا جورنيكا تانيه
ارسموا بدم الجدود
أحلام تعيش طول الزمان
أحلام لا يمكن .. ف يوم تموت
(المشهد السادس)
في القاعة فيلم حزين
بيروي حكاية أرض البشر
لكن الحضور فقعوا العيون
قطعوا الودان والألسنه
طاروا من غير أجنحه
وارتموا .... ف حضن القدر
ليست هناك تعليقات:
إرسال تعليق