بقى معقول
لسه الطفل
جواك زعلان
بقى معقول
لسه ملامحك خايفه تبان
جوه الصوره
ومراكب الشمس
اللي كنت بتلعب فيها
ف عز الليل
تاهت جوه بحور الخوف
ضلت سكه مابين شطين
بقى معقول
ينساك الليل
جوه مغاره
بقى معقول
آلة الزمن
بقت خربانه
وهترجع تاني
إنسان حجري
عايش ف الطين
بقى معقول ينساك الليل
ولا أنتا
حابب ترسم نور الشمس حبال
حابب تمشي عليها ف سيرك الليل
حابب كل قطور الموت
تدهس حلمك كل يومين
آه يا جبان
بص ف وش الليل واصرخ
أمسك أيد الشمس وعدي
طريق الموت
أشرب كل دموع السكه
يمكن بذر القلب ينبت
فجر جديد
ولا أنتا
حابب تمشي ف ضل الليل
بقى معقول
ينساك الليل
ليست هناك تعليقات:
إرسال تعليق